Rev 14 | BOJ | STEP | Onaqa e olo ŋam atsimqa Kaja Du a Saion manaq di tigelesonaq unem. Tamo 144,000 naŋgi dego a koba na tigelesonab unjrem. Unjrem di naŋgo lanjaq di Kaja Du aqa segi ñam ti aqa Abu aqa ñam ti neŋgreŋyonab soqnej.

Revelation of John 14

Kaja Du aqa tamo uŋgasari naŋgi lou bunuj na louoqneb

1 Onaqa e olo ŋam atsimqa Kaja Du a Saion manaq di tigelesonaq unem. Tamo 144,000 naŋgi dego a koba na tigelesonab unjrem. Unjrem di naŋgo lanjaq di Kaja Du aqa segi ñam ti aqa Abu aqa ñam ti neŋgreŋyonab soqnej. 2 Onaqa laŋ goge dia tamo uŋgasari tulaŋ gargekoba naŋgi anjam bei murqumyosib mareqnabqa e naŋgo kakoro quem. Naŋgo anjam di quem ya koba meli dosiq anjam ateqnu dego bul. Anjam di kola anjam ateqnu dego kere. E anjam di quem tamo na gombiŋ anjameqnub dego bul. 3 Tamo uŋgasari naŋgi di Qotei aqa awo jaram koba namoq di tigelesosibqa wagme qolqe ŋambile so qaji naŋgi ti gate kokba naŋgi ti naŋgo ŋamgalaq dia lou bunuj na louoqneb. Tamo 144,000 Qotei na nami mandamq dena awaiyeleŋej qaji naŋgi segi lou di qalieqa kere. Tamo qudei naŋgi lou di qalieqa keresai. 4 Tamo 144,000 naŋgi di nami uŋa ti sambalaosaioqneb. Deqa naŋgo jejamu yala jigatosai. Naŋgi une saiqoji. Kaja Du a walwelosiq sawa sawaq gileqnaqa naŋgi a dauryosib laqnub. Tamo uŋgasari kalil mandamq di unub qaji naŋgo ambleq dena Qotei na tamo 144,000 naŋgi di awaiyeleŋej. Tamo naŋgi di Qotei na eleŋej deqa naŋgi iŋgi meli bunuj bulosib Qotei wo Kaja Du wo naŋgo segi tamo unub. 5 Naŋgi nami gisaŋ anjam bei marosaioqneb. Naŋgo jejamuq di une bei saiqoji.

Laŋ aŋgro qalub naŋgi Qotei aqa anjam tamo uŋgasari naŋgi minjroqnsib laqneb

6 Ariya e olo ŋam atsimqa laŋ aŋgro bei laŋ sorgomq dia pururueqnaqa unem. Laŋ aŋgro dena Qotei aqa anjam bole bati gaigai sqas qaji di osi giloqnsiqa tamo uŋgasari kalil mandamq di unub qaji naŋgi minjroqnsiq laqnej. Tamo uŋgasari leŋ segi segi qaji, sawa segi segi qaji, anjam maro segi segi qaji, jejamu segi segi qaji naŋgi turtnjroqnsiq anjam bole di minjroqnsiq laqnej. 7 A tulaŋ koba leleŋoqnsiqa endegsi minjroqnej, “Qotei a na tamo uŋgasari naŋgo kumbra uge uge qa naŋgi peginjrsim ñumqajqa bati brantqo. Deqa niŋgi Qotei ulaiyoqnsib aqa ñam soqtoqniye. Qotei a laŋ ti mandam ti yuwal ti ya jumbum ti kalil gereiyej. Deqa niŋgi a qa louoqniye.”

8 Onaqa laŋ aŋgro bei na laŋ aŋgro di dauryosiq bej. Bosiq endegsi marej, “Qure koba Babilon a tulaŋ padalougetqo! Od, a tulaŋ padalougetqo! Babilon a na tamo uŋgasari kalil mandamq di so qaji naŋgi aqa sambala kumbra dauryoqnqajqa deqa are tigeltetnjroqnej. Aqa kumbra di a na wain siŋgila koba naŋgi anainjreqnaq nanarioqneb dego bul.”

9 Onaqa laŋ aŋgro bei a laŋ aŋgro aiyel naŋgi di daurnjrsiq bej. Bosiqa tulaŋ koba leleŋosiqa marej, “Tamo bei a wagme juwaŋ naŋgi aqa sulum wo qa louoqnsimqa aqa lanjaqsi baŋqsi toqor oqas di a wain siŋgila koba uyobulqas. 10 Wain di Qotei aqa minjiŋ siŋgila koba. Qotei a nami wain di ya ti bulyosai. Deqa tamo bei aqa lanjaqsi baŋqsi wagme juwaŋ aqa toqor oqas di aqa une deqa Qotei na a pegiyosimqa aqa segi minjiŋ gambaŋq di qamsim anaiyim uyqas. Uysimqa Qotei aqa laŋ aŋgro naŋgi Kaja Du ombla na naŋgo ŋamgalaq dia ŋamyuo na ti meniŋ yuo na ti jaqatiŋ koba oqnsim sqas. 11 Ŋamyuo di aqa qurem bati gaigai oqoqnqas. Tamo naŋgi wagme juwaŋ aqa ñam ti aqa toqor ti osibqa aqa sulum wo biŋinjroqnqab di naŋgi bati gaigai qanam ti qolo ti jaqatiŋ koba oqnsib sqab. Naŋgi aqaratqa keresai.”

12 Kumbra di brantimqa Qotei aqa segi tamo uŋgasari naŋgi unsibqa siŋgila na tigelesoqnebe. Tamo uŋgasari naŋgi di agi Qotei aqa dal anjam geregere dauryoqnsibqa naŋgo areqalo Yesus qa siŋgilateqnub.

13 Onaqa tamo bei a laŋ goge dia tulaŋ koba leleŋonaqa e aqa kakoro quem. A na merbej, “Ni anjam endegsi neŋgreŋye, ‘Bini qa ti bunuq qa ti tamo uŋgasari kalil Tamo Koba Yesus qa naŋgo areqalo siŋgilateqnub qaji naŋgi di jeu tamo naŋgi na ñumoqnib moreŋoqnqab. Deqa naŋgi tulaŋ areboleboleinjrim sqab.’ O Jon, ni anjam degsi neŋgreŋye.” Onaqa Qotei aqa Mondor Bole a dego merbej, “Tamo uŋgasari Yesus qa naŋgo areqalo siŋgilateqnub qaji naŋgi tulaŋ areboleboleinjrim sqab. Di kiyaqa? Naŋgi qalieonub, naŋgi mandam qa wau kalil uratosib laŋ qureq oqsib dia aqaratosib sqab. Kumbra bole bole kalil naŋgi mandamq dia yoqneb qaji di aqa awai bole naŋgi laŋ qureq oqsib dia itqab.”

Mandam qa iŋgi meli gentqa batiqo

14 Ariya e olo ŋam atsimqa laŋbi qat unem. Tamo bei laŋbiq di awesoqnej. Tamo di a Tamo Aŋgro bul. Aqa gateq di gate tatal gol na gereiyo qaji di atsiq soqnej. Aqa baŋq di sarep olekoba tulaŋ qala uge ojesoqnej. 15 Onaqa olo laŋ aŋgro bei Qotei aqa atra talq dena brantosiq tulaŋ koba leleŋosiqa tamo laŋbiq di awesoqnej qaji di minjej, “Iŋgi meli gentqa batiqo. Mandam qa iŋgi kalil meliekritonub. Deqa ni ino sarep osimqa iŋgi meli giŋgeŋye.” 16 Onaqa tamo laŋbiq di awesoqnej qaji a na aqa sarep ganiŋyosiqa mandamq di iŋgi melieleŋej di kalil giŋgeŋyej.

17 Onaqa olo laŋ aŋgro bei Qotei aqa atra tal laŋ qureq di unu qaji dena brantej. A dego sarep tulaŋ qala uge ojesoqnej. 18 A brantonaqa olo laŋ aŋgro bei na a dauryosiqa Qotei aqa atra bijalq dena brantej. Laŋ aŋgro di Qotei na siŋgila yonaqa a ŋamyuo taqatosiq soqnej. A brantosiqa tulaŋ koba leleŋosiqa laŋ aŋgro sarep tulaŋ qala uge ojesoqnej qaji di minjej, “Mandam qa wain sil aqa gei meliekritonub. Deqa ni ino sarep tulaŋ qala uge di osimqa wain sil aqa gei giŋgeŋyosim sawa qujaiq di koroinjre.” 19 Degsi minjnaqa laŋ aŋgro dena tigelosiqa aqa sarep osiqa ganiŋyonaqa mandamq di wain sil aqa gei melieleŋej qaji di kalil giŋgeŋyekritsiqa sawa qujaiq di koroinjrej. Osiqa wain gei parato qaji kulum kobaqujaq dia breinjrej. Kulum di Qotei aqa minjiŋ. 20 Kulum di qure koba aqa polomq di ateb unu. Kulumq dia naŋgi na wain sil aqa gei paraparainjrnabqa kulumq dena leŋ koba aisiqa mandamq di tulaŋ koba maqosiq oqsiq hos naŋgo medabu tiŋq di diŋej. Osiqa sawa tulaŋ kobaquja kabutej. 300 kilomita dego.